Merkileg tímamót!

Í leik Liverpool og Manchester United á Old Trafford um helgina má segja að tvenn merkileg tímamót hafi orðið. Bæði tímamótin tengjast nýjum framkvæmdastjóra Liverpool í leik á móti Manchester United. 

Í fyrsta lagi varð Arne Slot fyrsti framkvæmdastjóri Liverpool frá árinu 1975 til að stýra Liverpool til sigurs á móti Manchester United í fyrstu tilraun. Bob Paisley afrekaði þetta síðast í nóvember 1975 þegar Liverpool vann Manchester United 3:1 á Anfield Road.  

Í annan stað varð Arne Slot fyrsti framkvæmdastjóri Liverpool frá árinu 1936 til að stjórna Liverpool til sigurs í sínum fyrsta útileik gegn Manchester United. George Kay, sem er á mynd hér að ofan, stýrði Liverpool til sigurs 2:5 á Old Trafford í nóvember 1936. 

Það sem meira er þá eru Arne og George einu framkvæmdastjórar Liverpool, í allri sögu félagsins, til að stýra Liverpool til sigurs í útileik á móti Manchester United í fyrstu tilraun. Vel að verki staðið!