Við erum vonsviknir!

Virgil van Dijk segir að leikmenn Liverpool séu mjög vonsviknir yfir því að vera úr leik í Evrópudeildinni. Stefnt var á að vinna keppnina en svo verður því miður ekki! Sigur á Atalanta á Ítalíu dugði ekki. 

,,Til að byrja með er rétt að hrósa Atalanta. Við fórum illa að ráði okkar í síðustu viku. Við vorum mjög slakir í þeim leik en þeir náðu fullkomnum leik. Þá var skaðinn skeður. Þeir verðskulda að fara áfram. Við erum vonsviknir yfir því að vera úr leik í keppninni því okkur langaði mikið til að vinna hana."


Næsta mál á dagskrá hjá Liverpool er að fara til London þar sem liðið mætir Fulham á morgun. Liverpool hefur ekki unnið tvo síðustu deildarleiki. Það er því mál til komið að koma sér á rétta braut því það er ennþá möguleiki á að vinna enska meistaratitilinn. Sigurinn á Ítalíu gefur vonandi eitthvað sjálfstraust.