Af kvennaliðinu

Hér eru nýjustu fréttir af kvennaliði Liverpool. Liðið komst áfram í FA bikarnum um helgina með 0:2 sigri á London City Lionesses sem spilar í næst efstu deild. Í næstu umferð á undan um miðjan janúar vann liðið líka útisigur 0:1 á Bristol City. Næst eru átta liða úrslit og mætir Liverpool Leicester City. Liverpool fékk loksins heimaleik. 

Riðlakeppni Deildarbikarsins lauk í desember. Liverpool vann Everton 1:2 í síðasta leik og var það eini sigur liðsins. Áður hafði Liverpool tapað fyrir báðum Manchester liðunum, sem fóru áfram, og Leicester City. Liverpool endaði í næst neðsta sæti síns riðils. 

Liverpool spilaði tvo deildarleiki í desember fyrir vetrarhlé. Fyrst gerði liðið 1:1 jafntefli við Bristol City á heimavelli. Liverpool endaði svo árið á góðum útisigri 1:2 á Manchester United. 


Liverpool hefur leikið þrjá deildarleiki það sem af er nýja árinu. Fyrstu tveir töpuðust. Fyrst kom stórtap 5:1 í Manchester fyrir City og svo 0:2 tap heima gegn Arsenal. Bæði töpin fyrir liðum sem eru í toppbaráttunni. Síðasti deildarleikur fór 1:1 við Tottenham. Litlu munaði að Liverpool tapaði leiknum en Marie Therese Höbinger jafnaði í viðbótartíma. Leikurinn var á heimavelli Liverpool Prenton Park sem er alla jafna heimavöllur Tranmere Rovers.

Sem stendur er Liverpool í fimmta sæti með 19 stig eftir 13 leiki. Chelsea leiðir deildina með 34 stig. Bristol City er neðst með sex stig. Liverpool siglir því lygnan sjó um miðja deild.