Tækifæri til hefnda!

Í dag var dregið til 16 liða úrslita í Meistaradeildinni. Liverpool fær tækifæri til hefnda fyrir úrslitaleikinn í keppninni í vor en liðið mætir Real Madrid. Eins og allir muna vann spænska liðið Liverpool 1:0 í úrslitaleik Meistaradeildarinnar í París. 

Fyrri leikur liðanna fer fram á Anfield Road þriðjudaginn 21. febrúar. Sá seinni verður leikinn miðvikudaginn 15. mars á  Santiago Bernabeu leikvanginum í Madríd. Hér að neðan eru 16 liða úrslitin í heild sinni. 


Liverpool á sannarlega harma að hefna á móti Real Madrid. Sem fyrr segir vann Real Liverpool í úrslitum Meistaradeildarinnar í vor. Sama var uppi á teningnum vorið 2018 þegar Real vann 3:1 í úrslitaleik í Kiev. Real sló svo Liverpool út úr Meistaradeildinni í átta liða úrslitum á leiktíðinni 2020/21. Real vann þá 3:1 í fyrri leiknum í Madrid en liðin skildu svo án marka á Anfield. Vonandi er nú komið að því að Liverpool hafi betur á móti spænska liðinu. Það er kominn tími á það!