Mjög gaman að komast á markalistann!

Jordan Henderson, fyrirliði Liverpool, skoraði gullfallegt sigurmark 3:2 gegn AC Milan í gærkvöldi. Hann sagði að það hefði verið mjög gaman að komast aftur á markalistann en þetta var fyrsta mark hans á keppnistímabilinu. Það sem meira var að þetta var fyrsta mark Jordan fyrir Liverpool frá því í desember í fyrra!

,,Já, það var mjög gaman að komast aftur á markalistann. Það er nokkuð síðan að ég skoraði síðast og það er alltaf gaman að skora. Ef ég fer að spila aðeins framar á vellinum þá held ég að ég þurfi að reyna að skora af og til. Það var gaman að komast á markalistann og ná að skora sigurmarkið í leiknum."

,,Þetta var góður leikur. Eiginlega rússibanaferð og ég er viss um að hlutlausum áhorfendum fannst gaman að horfa á leikinn. Það var gaman að hafa aftur áhorfendur á Evrópukvöldi á Anfield. Þegar upp var staðið var þetta ótrúlegur leikur!"

Liverpool byrjaði Evrópuvegferðina stórvel með sigri á AC Milan þó svo að ítalska liðið kæmist aftur inn í leikinn og næði að jafna eftir mikla yfirburði Liverpool framan af. Jordan Henderson gaf það ekki eftir og tryggði Liverpool sigur. Knattspyrnusamband Evrópu valdi hann Mann leiksins.