Trent og Keita klárir í slaginn

Trent Alexander-Arnold og Naby Keita eru farnir að æfa á fullu og geta tekið þátt í leiknum gegn Wolves ef þörf er á. Trent hefur verið frá í mánuð og Keita í tvær vikur. 

Klopp vildi ekkert segja til um hvort, og þá hversu mikið, þeir spiluðu, en þeir yrðu að öllum líkindum í leikmannahópnum.

Meiðslalistinn er engu að síður langur. Alisson Becker, James Milner og Xerdan Shaqiri eru áfram frá. Alex Oxlade-Chamberlain er á góðu róli í sinni meðferð og ekki langt í að hann geti spilað. Enn eru hins vegar nokkrar vikur í að Thiago Alcantara verði heill. Joe Gomez og Virgil van Dijk eru svo áfram frá í töluverðan tíma, þó að myndir af van Dijk í æfingasalnum veki vonir um að það sé kannski styttra í hann en útlit var fyrir í upphafi.