Eigum skilið að verða Englandsmeistarar!

Jürgen Klopp segir að Liverpool eigi skilið að verða Englandsmeistari á þessu keppnistímabili! Flóknara er það nú ekki!

,,Fólk talaði um að hætta leik og ógilda keppnistímabilið. Ha? Við erum búnir að spila 75% af keppnistímabilinu og einhverjir vilja bara stroka allt út! Persónulega hefði mér fundist geysilega ósanngjarnt að allt í einu væri bara ákveðið að allt sem búið er af leiktíðinni hefði aldrei gerst! Á þessari leiktíð eigum við einfaldlega skilið að verða meistarar!"

Þetta er í fyrsta sinn sem einhver úr herbúðum Liverpool hefur tjáð sig um keppnistímabilið sem hefur verið stopp frá því í mars eftir að heimsfaraldurinn skall á. Það var meðvituð ákvörðun allra hjá Liverpool að ræða stöðuna í deildinni og framvindu hennar ekkert þar sem flestum hefði líklega þótt skoðanir þeirra mótast af því að sigur í deildinni var svo til í höfn.