"Hef þurft að breyta leik mínum"

Mohamed Salah segir að það hafi tekið sig smá tíma að aðlagast því þegar varnarmenn breyttu því hvernig þeir spiluðu á móti honum. Hann telur að til dæmis Manchester United, og fleiri lið, verjist öðruvísi gegn honum en öðrum leikmönnum.

Salah er í ítarlegu viðtali á Sky Sports til að hita upp fyrir stórleikinn gegn Manchester United á sunnudag. Hann sagði að það verði lítið mál að gíra sig upp í leikinn og stuðningsmenn hjálpi til við það. "Ég held að Manchester United leiki öðruvísi á móti mér en sumum öðrum leikmönnum. Þeir verjast mér öðruvísi. Það gerir mér erfitt fyrir, en ég er líka ánægður með það. Á meðan liðið vinnur leiki er ég alltaf ánægður."

Eins og menn muna sló Salah rækilega í gegn á sínu fyrsta tímabili og skoraði þá 44 mörk, þar af 32 í deildinni. Það var viðbúið að hann myndi ekki ná sömu hæðum á næsta tímabili, þó ekki nema af því að andstæðingurinn passaði betur upp á hann. "Ég spilaði meira eins og kantmaður á mínu fyrsta tímabili hér. Á næsta tímabili þá var erfiðara að sýna hvað ég gæti þegar hin liðin vörðust mér öðruvísi á vængnum. Ég vissi að það biðu mín alltaf tveir leikmenn þar. 

Ég varð að breyta staðsetningunum hjá mér. Núna dreg ég mig stundum í átt að miðjunni og spila meira þar, og stundum spila ég sem framherji. Þessi breyting tók á, en ég held að þetta sé að ganga vel. Ég var markahæsti leikmaður liðsins á síðasta tímabili, sem er frábært. 

Ég reyni fyrir leiki að skoða andstæðinginn vel. Ég skoða hvaða leiðir eru fyrir mig að skora hjá þeim. Ég held að það hafi gengið vel því að ég skora mikið fyrir liðið. Ég held að ég sé að bæta margt í leik mínum og það er hægt að bæta margt í viðbót."



Þessi góða frammistaða hefur líka sett aukna pressu á hann. Þegar það koma nokkrir leikir sem hann nær ekki að skora er gagnrýnin fljót að láta á sér kræla. Salah segir þetta fylgja því að vera í góðu liði. "Besta leiðin til að tala á þessu er að einbeita sér að því sem maður þarf að gera og síðan gera það rétt í hverjum leik."

Og hans verk felst ekki aðeins í að skora mörk. Enginn leikmaður Liverpool hefur búið til fleiri færi en hann frá því 2017 þegar hann kom til félagsins. Hann á líka flestar stoðsendingar á þessu tímabili. Margir dæma hann, og reyndar fleiri leikmenn, út frá mörkunum en hann segir að á æfingum er líka mikið lagt upp úr því að hann leggi upp á samherja sína.

"Í síðasta leiknum, gegn Tottenham, lagði ég upp mark fyrir Bobby [Firmino] og ég er ánægður fyrir hans hönd að hann skoraði. Án stoðsendinga - og þá á ég ekki bara við mínar stoðsendingar - vinnur maður ekki leiki. Ég get heldur ekki hugsað of mikið um að skora sjálfur því með því breytist leikur minni ekkert og andstæðingarnar átta sig á hvernig er best að verjast mér. Ef ég fæ boltann og næ að skapa færi eða gefa stoðsendingu get ég ruglað þá. Þetta snýst allt um að vera klárari en andstæðingurinn."

Jurgen Klopp hefur ekki aðeins hrósað Salah fyrir frammistöðuna á vellinum heldur líka fyrir að hafa góð áhrif á liðsandann. "Í mínum huga byrjar þetta allt í búningsklefanum. Tengslin við aðra geta haft gríðarlega áhrif á vellinum. Það er mjög gott á milli okkar allra og ég held að það hjálpi okkur í leikjum og á æfingum. Það skapar góðan anda." Salah segir þennan anda líka vera í kringum Klopp.

Gengi liðsins hefur farið stigbatnandi frá því að Salah kom til liðsins. Það endaði í fjórða sæti 2018 og öðru sæti í fyrra. "Þegar ég er spurður hvað ég vilji, er svarið alltaf það sama: Ég vil vinna ensku úrvalsdeildina. Ég hef alltaf haft trú á því að við getum það og við stefnum að því. Ef við leggjum vinnuna á okkur ávöxtum við í samræmi við það."