Ki-Jana Hoever Evrópumeistari

Ungliðinn Ki-Jana Hoever varð á dögunum Evrópumeistari með hollenska undir 17 ára landsliðinu. Hann þótti spila mjög vel á mótinu sem fór fram á Írlandi. 

Holland vann keppnina með því að vinna 4:2 sigur á Ítalíu í úrslitaleik. Þetta var í fjórða sinn sem Holland verður Evrópumeistari í þessum aldursflokki. 

Ki þótti með betri leikmönnum hollenska liðsins og var valinn í úrvalslið keppninnar. Hann skoraði eitt mark í úrslitakeppninni. Ki lék sinn fyrsta leik með aðalliði Liverpool í vetur. Hollendingurinn, sem er miðvörður, þykir með allra efnilegustu leikmönnum Liverpool.

England vann keppnina í fyrra og þá voru þeir Bobby Duncan og Elijah Dixon-Bonner, sem urðu Unglingabikarmeistarar með Liverpool í vor, í liðshópnum.