Dominic Solanke til Bournemouth

Nokkuð óvænt var tilkynnt rétt í þessu að Dominic Solanke hefur gengið til liðs við Bournemouth.

Framherjinn ungi hefur verið leikmaður Liverpool síðustu 18 mánuði og spilað alls 27 leiki. Hann skoraði eitt mark í þessum leikjum en það kom á lokadegi síðasta tímabils á Anfield gegn Brighton.

Kaupverðið er talið vera í kringum 19 milljónir punda sem verður að teljast ágætt verð. Solanke hefur því miður ekki fengið mörg tækifæri hjá Liverpool þar sem samkeppni um framherja stöðurnar hefur verið ansi hörð undanfarið.

Við óskum Solanke góðs gengis hjá nýju félagi.