Fimmti leikmaður Liverpool sem leikur til úrslita á HM

Dejan Lovren verður á morgun fimmti leikmaðurinn í sögu Liverpool til að leika til úrslita á HM, hann mun einnig deila mögnuðu meti með Thierry Henry eftir morgundaginn.  

Dejan Lovren hefur verið fastur maður í liði Króata sem komið er alla leið í úrslit HM, flestum að óvörum. Ef hann spilar leikinn á morgun (sem hann gerir nokkuð örugglega) kemst hann í hóp með Roger Hunt, Dietmar Hamann, Fernando Torres og Dirk Kuyt, en þeir komu allir við sögu í úrslitaleikjum HM meðan þeir voru leikmenn Liverpool. 

Hunt varð heimsmeistari með Englendingum 1966. Spilaði allan leikinn, sem fór í framlengingu. Hamann spilaði 90 mínútur í úrslitaleik Þýskalands og Brasilíu 2002, þar sem Þjóðverjar töpuðu.

Kuyt og Torres tóku síðan báðir þátt í úrslitaleik Spánar og Hollands 2010, en þeir mættust raunar ekki. Kuyt var tekinn út af eftir rúmar 70 mínútur og Torres kom inná í seinni hálfleik framlengingar - og var inná vellinum þegar Iniesta tryggði Spánverjum fyrsta og eina heimsmeistaratitil sinn. 

Ef Lovren spilar á morgun verður hann einnig aðeins annar maðurinn í sögu ensku Úrvalsdeildarinnar til að spila úrslitaleik í Meistaradeildinni og HM á sama tímabili. Það gerði Thierry Henry 2006, þegar Arsenal tapaði fyrir Barcelona í CL og Frakkar töpuðu fyrir Ítölum á HM.