Nágrannaslagurinn færður

Í kjölfarið á Meistaradeildardrættinum í gær var ákveðið að færa leik Everton og Liverpool yfir á laugardaginn 7. apríl og hefst hann klukkan 11:30.

Leikurinn hafði verið færður til sunnudagsins 8. apríl en þar sem Liverpool mætir City í seinni leik liðanna í 8-liða úrslitum Meistaradeildarinnar þriðjudaginn 10. apríl þótti réttast að leyfa leikmönnum Liverpool að ná að hvíla sig betur fyrir átökin.  Síðar þennan sama laugardag mætast Manchester City og Manchester United þannig að bæði lið eiga mikilvæga nágrannaslagi fyrir höndum á milli viðureignanna í Meistaradeildinni.  Leikur City og United hefst klukkan 17:30 að breskum tíma.

Jürgen Klopp var ekki mjög kátur þegar hann frétti af því að nágrannaslagurinn hefði verið færður.  Hann var spurður hvort þetta myndi ekki í raun hjálpa liðinu og svaraði hann því:  ,,Nei, þetta þýðir að leikmennirnir vakna á fimmtudagsmorgni, borða morgunmat eða hádegismat, taka svo æfingu og daginn eftir eru menn að koma sér í stand fyrir leik sem hefst daginn eftir klukkan 12:30" (að breskum tíma, innsk.).

,,Þetta er ekki fullkomin staða en við tökum henni eins og hún er.  Hver sá sem setti þessa áætlun upp um að láta okkur spila á sunnudegi hefur ekki haft mikla trú á því að við færum lengra í Meistaradeildinni."

Klopp benti jafnframt á að hann hefði viljað láta leikinn fara fram klukkan 15:00 að hefðbundnum laugardags leiktíma í Englandi og sagði að þessar auka klukkustundir sem City fá fyrir undirbúning gegn United væru ótrúlega mikilvægar.