Daniel fer heim!

Daniel Sturridge er á heimleið frá Spáni. Hann hefur verið lasinn, ekkert getað æft og talið var best að hann færi heim úr æfingabúðunum á La Manga. Hann mun byrja æfingar á Melwood um leið og pestin rjátlast af honum. 


Daniel hefur átt erfitt uppdráttar síðustu vikurnar. Hann skoraði tvö mörk í jólatörninni. Fyrst gegn Stoke City og svo Sunderland en síðan hefur hvorki gengið né rekið. Hann fékk tvo upplögð marktækifæri í seinni leikjum í undanúrslitarimmunni við Southampton í Deildarbikarnum og hefði hugsanlega getað komið Liverpool í úrslitaleikinn. En það tókst ekki og hann hefur verið fjarri sínu besta í síðustu leikjum sem hann hefur fengið tækifæri í. 


Sumir sparkspekingar telja að Daniel Sturridge muni yfirgefa Liverpool í sumar. Hvort þeir hafa rétt fyrir sér kemur í ljós en það væri gott ef hann næði sér á strik til vorsins því ekki þarf að efast um hæfileika hans í að skora mörk.