Pedro Chirivella lánaður

Spánverjinn ungi Pedro Chirivella hefur verið lánaður út þetta tímabil til hollenska liðsins Go Ahead Eagles.

Chirivella, sem verður tvítugur síðar á þessu ári hefur spilað reglulega fyrir U-23 ára lið félagsins á tímabilinu en nú mun hann vonandi öðlast dýrmæta reynslu í efstu deild Hollands.  Go Ahead Eagles sitja sem stendur í neðsta sæti deildarinnar og eru í harðri fallbaráttu.

Chirivella kom til Liverpool árið 2013 frá Valencia á Spáni og spilaði hann í fyrsta sinn fyrir aðallið félagsins gegn Bordeaux í Evrópudeildinni á síðasta tímabili.  Síðan þá hefur hann tekið þátt í þremur leikjum í FA bikarnum og einum deildarleik en þá var hann í byrjunarliði gegn Swansea í 3-1 tapleik á útivelli.