Mario og Glen meiddir

Þeir Mario Balotello og Glen Johnson eru báðir meiddir og verða ekki til taks þegar Liverpool mætir Bournemouth í Deildarbikarnum á morgun.

Glen fór meiddur af velli á móti Manchester United um helgina. Búist er við því að hann verði frá leik í allt að mánuð.

Mario kom á hinn bóginn inn á sem varamaður eftir að hafa verið meiddur síðustu vikurnar. Nú má velta því fyrir sér hvort Mario hafi verið sendur of snemma til leiks en það kom nokkuð á óvart að hann skyldi vera í liðshópnum fyrir leikinn í Manchester. Báðir eru þeir Mario og Glen meiddir á nára. 

Eftir því sem Brendan Rodgers sagði á blaðamannafundi í dag þá eru aðrir leikmenn Liverpool leikfærir. Undanskilinn er þó Jon Flanagan en hann hefur verið meiddur frá því í sumar.