Búið spil!

Brendan Rodgers, framkvæmdastjóri Liverpool, sagði eftir jafntefli Liverpool og Crystal Palace í gærkvöldi að möguleikinn á Englandsmeistaratitilinn væri úr sögunni. Hann var spurður eftir leikinn hvort allt væri búið fyrir Liverpool.  

,,Já, mín skoðun var sú að við þyrftum að sigra í kvöld til að halda pressunni. Manchester City var með þetta í sínum höndum svo við þurftum að vinna í kvöld til að setja svolitla pressu á þá fyrir leik þeirra á móti Aston Villa. Ég er viss um að Aston Villa gerir þeim erfitt fyrir því þeir eru með góða leikmenn í sinum röðum og þeir hafa staðið í fjórum efstu liðunum. En ég held að allir búist við því að Manchester City vinni leikina og klári málið."

Jú, líklega reikna ekki margir með kraftaverki sem myndi færa Liverpool Englandsmeistaratitlinn. Kraftaverk felst í tveimur jafnteflum Manchester City við Aston Villa og West Ham United eða þá einu tapi í þessum tveimur leikjum. Markahlutfallssigur yrði meira en kraftaverk. Báðir leikir City eru á Etihad leikvanginum.