Moses hlakkar til kvöldsins

Victor Moses á það sammerkt með okkur stuðningsmönnum Liverpool að hann hlakkar gríðarlega til kvöldsins. ,,Eitt það besta sem fótboltinn býður upp á" segir kappinn. 

Liverpool heimsækir nágranna sína og erkifjendur í Manchester United á Old Trafford í kvöld. Leikurinn er liður í 3. umferð deildabikarkeppninnar, en þrátt fyrir að sú keppni sé kannski ekki sú merkilegasta í bransanum gerir Victor Moses sér fulla grein fyrir mikilvægi leiksins. 

,,Það þekkja allir söguna milli þessara liða. Það er vart hægt að hugsa sér stærri leiki á Englandi en viðureignir þessara erkifjenda."

,,Þetta verður auðvitað ekki léttur leikur fyrir okkur, en það breytir því ekki að við hlökkum mikið til. Við munum reyna að gera okkar besta til þess að vinna í kvöld."

,,United hefur ótrúlega góða tölfræði á Old Trafford og það er ekki auðvelt að mæta þeim þar, en vonandi tekst okkur vel upp í kvöld. Það væri frábær upplifun að ná að leggja þá á sínum heimavelli. Það er varla hægt að ímynda sér stærri stund fyrir leikmann Liverpool."