Luis kemur líklega við sögu

Allt útlit er á því að Luis Suarez komi við sögu þegar hann mætir til leiks á Old Trafford hungraður í að spila nýsloppinn úr leikbanninu langa. Liverpool mætir Manchester United í Deildarbikarnum í kvöld og Brendan Rodgers segir að Luis verði í leikmannahópnum og leikfær.
 
,,Hann kemur örugglega inn í liðshópinn og við erum alveg rosalega ánægðir með að fá hann aftur. Það hefur verið mjög erfitt fyrir hann að geta ekki spilað. En ég verð að segja að hann hefur undirbúið sig síðustu vikurnar af sérlega mikilli kostgæfni með mikilli samviskusemi á æfingum."

,,Allir vita um þá miklu hæfileika sem hann býr yfir, viðhorfi hans og hversu mikið hann leggur á sig. Ég er viss um að hann á eftir að sýna hæfileika sína þegar hann kemur núna til leiks eins og hann hefur gert alla tíð frá því hann kom hingað fyrst."

,,Hann elskar þessa íþrótt, hann lifir fyrir hana og leggur sig alltaf allan fram. Við reiknum ekki með neinni breytingu þar á því þetta er allt í skapgerð hans."

Liverpool hefur nú þegar einn sigur á Manchester United það sem af er leiktíðar. Daniel Sturridge tryggði 1:0 sigur á Anfield á dögunum og nú mætast risarnir aftur. Brendan hlakkar til leiksins. 

,,Þetta eru alltaf jafnir leikir. Ég hlakka virkilega til að fara þangað. Líklega verða 7.000 stuðningsmenn okkar þar og það verður frábært að hafa þá. Stemmningin á leiknum á Anfield var alveg mögnuð og stuðningsmennirnir hjálpuðu okkur virkilega mikið. Ég er viss um að þeir gera það líka þar. Það skiptir engu máli hvað langt er komið eða hver keppnin er. Þetta eru alltaf stórleikir og við hlökkum til."

Liverpool þarf á því að halda að komast sem lengst í báðum bikarkeppnunum á þessari leiktíð. Það verður erfitt að komast áfram í Deildarbikarnum eftir að hafa dregist á útivelli á móti Manchester United en það þarf að komast yfir þær hindranir sem á vegi verða og nú þurfa leikmenn Liverpool að sýna sitt rétta andlit í kvöld. Það verður áhugavert að sjá hvaða hlutverk Luis Suarez á eftir að leika á Old Trafford. Næsta víst er að hann mun ekki láta sitt eftir liggja!

Hér má Brendan Rodgers ræða um leikinn.

Hér er myndband um endurkomu Luis Suarez.