Skoraði afmælismark á annarri löppinni

Daniel Sturridge hélt upp á 24. afmælisdaginn sinn með því að að skora sigurmark á móti Manchester United. Hann gerði það að heita má æfingalaus á annarri löppinni. Daniel hefur heldur betur byrjað leiktíðina af krafti með þremur sigurmörkum. Hann hafði þetta að segja eftir sigurinn góða.

,,Það var frábært að ná þremur stigum á móti Manchester United á svona degi og ég er mjög ánægður með sigurinn. Ég æfði ekkert eftir leikinn við Notts County vegna þess að ég meiddist í honum. Ég varð að sleppa skotæfingum og í gær gerði ég sama og ekkert á æfingu. Í morgun fékk ég meðhöndlun líkt og ég hafði fengið á æfingum alla vikuna. Þegar upp var staðið náði ég að komast út á völl og hjálpa liðinu til sigurs. Maður vill ekki missa af svona leikjum og sem betur fer komst ég í gegnum leikinn."

Liverpool er nú í efsta sæti deildarinnar með fullt hús stiga. Daniel segir það auðvitað gleðilegt en mestu skipti að liðsandinn sé góður og allir vinni saman.

,,Það er frábær andi í liðinu og við vinnum allir saman. Það er allt mögulegt ef andinn er svoleiðis. Staðan í deildinni skiptir eiginlega ekki máli. Mestu skiptir að allir vinni saman sem lið og ef við gerum það munu hagstæð úrslit skila sér."