Meira en knattspyrna!

Brendan Rodgers segir að leikur Liverpool og Manchester United sé meira en bara knattspyrnuleikur. Hér er stolt borganna og allt annað undir! Norður Írinn segir rimmu þessara félaga mesta stórleik í ensku knattspyrnunni.

,,Ég held að flestir líti til leiksins með það í huga. Liverpool gegn Manchester United er stórleikur eins og þeir gerast stærstir. Þetta er meira en knattspyrnuleikur. Þarna kemur saga tveggja borga inn í. Maður er fulltrúi borgar sinnar og sögu hennar. Þetta er sannarlega meira en knattspyrnuleikur. En það er mikilvægt að halda ró sinni og hafa trú á verkefninu þegar komið er inn á völlinn og ná þeim úrslitum sem stefnt er að. Því þegar upp er staðið snýst allt um það!"

Liverpool tapaði báðum leikjunum fyrir Manchester United á síðustu leiktíð. Lánið var ekki með Rauða hernum á Anfield þegar gestirnir unnu 1:2. Maður rekinn af velli og sigurmark gestanna kom úr gefins víti.

,,Við vorum óheppnir í leik sömu liða í fyrra. Við töpuðum en við erum fullir sjálfstrausts fyrir þennan leik. Þetta ætti að vera jafn leikur. Við erum á heimavelli og ætlum okkur að taka frumkvæðið í leiknum."

Andi Bill Shankly mun venju fremur svífa yfir Anfield Road á morgun þegar aldarártíðar hans verður minnst. Hver veit nema sá gamli eigi eftir að hjálpa til við að verja mark Liverpool og skora hjá gestunum hinu megin á vellinum!