Setur Daniel Sturridge félagsmet?

Setur Daniel Sturridge félagsmet á sunnudaginn þegar Liverpool mætir Oldham Athletic í F.A. bikarnum? Hann er búinn að skora í þremur fyrstu leikjum sínum með Liverpool og það hafa sjö leikmenn áður afrekað í sögu Liverpool. Síðastur til að skora í fyrstu þremur leikjum sínum með Liverpool var Ray Kennedy í upphafi leiktíðarinnar 1974/75.

Daniel skoraði í fyrsta leik sínum þegar Liverpool vann Mansfield 1:2 í F.A. bikarnum og hann skoraði svo helgina eftir þegar Liverpool tapaði 2:1 á móti Manchester Untied. Hann skoraði svo um síðustu helgi þegar Liverpool vann Norwich 5:0.  

Nú er það svo að skori Daniel á móti Oldham verður hann fyrsti leikmaður í sögu Liverpool til að skora í fjórum fyrstu leikjum sínum með Liverpool. Það yrði mikið afrek og um leið nýtt félagsmet í sögu Liverpool. Það verður sannarlega spennandi að sjá hvort Daniel nær að skora í Oldham og koma sér rækilega á spjöld sögunnar!