Spáð í spilin

                                                                         
Liverpool v Norwich City

Það er aldrei nein lognmolla í kringum Liverpool og alltaf eitthvað í fréttum þó svo að liðið sé ekki einu sinni að spila. Núna í vikunni viðurkenndi Luis Suarez að hann hefði látið sig detta til að reyna fá vítasppyrnu þegar Liverpool mætti Stoke City á Anfiled í haust. Þetta voru nú auðvitað ekki nein tíðindi enda sá hver einasti maður að Luis lét sig falla og ekki nokkur maður nærri til að koma honum úr jafnvægi. Brendan Rodgers sagði óasættanlegt að Luis segðist hafa látið sig detta og sagði að málið yrði tekið fyrir innan veggja Anfield. En var það bara ekki gott hjá Luis að viðurkenna leikaraskapinn? Ég held að þetta hafi bara verið fínt hjá honum og sýnir heiðarleika sem sjaldan verður vart við í nútímaknattspyrnu!

Í dag mætir Liverpool Norwich City á Anfield Road. Liverpool vann fyrsta deildarleikinn undir stjórn Brendan Rodgers 2:5 á Carrow Road í haust og þá skoraði Luis Suarez þrennu. Þá voru flestir á því að Norwich myndi falla því liðið byrjaði deildina hroðalega og stuðningsmenn Norwich undu illa þeim skiptum að Chris Houghton skyldi taka við liðinu í stað Paul Lambert sem stakk af til Aston Villa. Hann sér líklega eftir því núna! En þegar leið að jólum náði liðið mjög góðri rispu og Chris náði góðu lagi á liðinu. Um jólin gekk illa og því ætti Liverpool að eiga góða möguleika á að ná sigri.

Norwich sótti stig til Liverpool á síðustu leiktíð þegar liðið náði 1:1 jafntefli. Craig Bellamy kom Liverpool yfir og félagar hans óðu í færum. Norwich jafnaði og náði að halda því með frábærri markvörslu og góðri hjálp tréveksins. Ekkert nýtt þar á ferð þegar leikir Liverpool eru annars vegar. En Liverpool vann 0:3 á Carrow Road og Liverpool hefur jafnan gengið mjög vel á móti Norwich.

Það er spáð kulda í Liverpool í dag og hita rétt um frostmark. En við skulum spá því að leikmenn Liverpool haldi stuðningsmönnum sínum vel heitum í dag. Luis Suarez á möguleika á því að skora þrennu í þriðja sinn á móti sama liðinu og Daniel Sturridge gæti skorað í þremur fyrstu leikjum sínum Liverpool. Er ekki óhætt að spá því að þeir tveir skori og hver veit nema að Luis skori þrennu? Ég hef fulla trú á að Liverpool vinni stórsigur. Gæti 5:1 ekki bara verið líkleg niðurstaða?

YNWA

Hér má sjá leikmenn Liverpool æfa sig fyrir leikinn.