Diego Cavalieri Brasilíumeistari

Diego Cavalieri varð fyrir ekki löngu Brasilíumeistari í knattspyrnu. Það muna kannski ekki allir eftir honum en hann var um tíma markmaður hjá Liverpool en er nú leikmaður Fluminense sem varð landsmeistari í Brasilíu 2012. Diego þótti leika lykilhlutverk í liðinu. Það er alltaf gaman þegar fyrrum leikmönnum Liverpool vegnar vel og þeir vinna til verðlauna.

Diego Cavalieri gekk til liðs við Liverpool sumarið 2008 og hélt á braut 2010. Hann fór þá til Cesena á Ítalíu og svo sama ár til Fluminense í heimalandi sínu. Diego var alltaf varamaður fyrir Jose Reina en náði að leika tíu leiki með Liverpool.

Fyrst verið að nefna fyrrum varamarkmenn Liverpool þá má minnast á Ítalann Daniele Padelli sem var frábær í marki Udinese á móti Liverpool um daginn. Segja má að hann hafi haldið Udinese á floti og komið í veg fyrir að Liverpool ynni stærri sigur en 0:1. 

Daniele kom sem lánsmaður frá Sampdoria í byrjun árs 2007 og fór aftur þangað eftir að leiktíð lauk. Hann lék einn leik í aðalliði Liverpool vorið 2007 og varð um leið fyrsti Ítalinn til að spila með Liverpool.