Joe með flestar heppnaðar sendingar

Á opinberri heimasíðu Liverpool má nú sjá ýmsa tölfræði úr tapleiknum gegn WBA á laugardaginn. Þar kemur margt jákvætt fram, þrátt fyrir afleit úrslit.

Joe Allen átti flestar heppnaðar sendingar leikmanna Liverpool í leiknum, en 95,6% sendinga nýliðans rötuðu á samherja. Næstur var Lucas Leiva með 92,6%. Glen Johnson og Martin Skrtel voru einnig með yfir 90% sendingahlutfall.

Joe Allen átti að auki næstflestar langar sendingar, en 16,2% sendinga hans í leiknum eru skilgreindar sem langar samkvæmt Opta-stat sem tekur tölfræðina saman. Allen var næst duglegastur okkar manna í löngu sendingunum, en Daniel Agger átti flestar langar sendingar, eða 16,7%.

88,9% sendinga okkar manna skiluðu sér til samherja, sem er talsverð bæting frá síðustu leiktíð en þá skiluðu að meðaltali rétt um 80% sendinga sér til samherja. Samtals gáfu okkar menn boltann 523 sinnum, en meðaltal síðustu leiktiðar hljóðar upp á 455 sendingar.

Jákvæð merki um bætingar í samleik breyta því þó vitanlega ekki að leikurinn tapaðist og það er jú tölfræðin sem mestu máli skiptir. Liverpool var meira með boltann en WBA og átti fleiri heppnaðar sendingar, en heimamenn áttu fleiri skot á markið og skoruðu öll mörkin í leiknum.

Vonandi er liðið okkar þó á réttri leið.