Miki Roque látinn

Í dag bárust þær sorglegu fréttir að Miki Roque, fyrrum leikmaður Liverpool, væri látinn. Banamein hans var krabbamein. Á hinni opinberu vefsíðu Liverpool, Liverpool.com, var lát Miki tilkynnt í dag en fyrst fréttist af því á vefsíðu Real Betis en Miki lék síðast með spænska félaginu áður en hann varð að leggja skóna á hilluna vegna veikinda sinna.

Rafael Benítez fékk Miki, sem fæddist 8. júlí 1988, frá spænska liðinu Lleida sumarið 2005. Miki yfirgaf Liverpool fjórum árum seinna og fór þá til Spánar. Hann lék sem lánsmaður hjá Oldham Athletic á meðan hann var hjá Liverpool og eins var hann lánsmaður hjá spænsku liðunum Xerex og Cartagena. Miki fékk svo samning við Real Betis en varð, sem fyrr segir, að hætta knattspyrnu á síðasta ári þegar hann veiktist. 

Miki varð unglingabikarmeistari með Liverpool vorið 2006. Liverpool vann þá Manchester City samanlangt 3:2. Miki skoraði þriðja mark Liverpool í fyrri leiknum á Anfield Road sem vannst 3:0. Hin mörkin skoruðu þeir Robbie Threlfall og Ryan Flynn. Miki var lykilmaður í meistaraliðinu. Hann lék oftast sem miðvörður og þótti með efnilegri leikmönnum í sigurliðinu.  

Miki lék einn leik með aðalliði Liverpool. Hann kom inn á sem varamaður þegar Liverpool tapaði 3:2 í Meistaradeildinni á móti Galatasaray í desember 2006. Þar með varð hann fyrsti leikmaðurinn úr sigurliðinu í Unglingabikarnum til að leika með aðalliði Liverpool.
 
Liverpool klúbburinn á Íslandi vottar fjölskyldu og vinum Miki Roque samúð.