| Grétar Magnússon

Agger frá í nokkrar vikur

Kenny Dalglish staðfesti það í dag að Daniel Agger verður frá í nokkrar vikur eftir að hann brákaði rifbein gegn Cardiff.  Daninn fór af velli undir lok venjulegs leiktíma á Wembley. Einnig er óvíst með Steven Gerrard eftir landsleik Englendinga.

Steven Gerrard sneri aftur á Melwood í dag þar sem hann verður skoðaður frekar en honum var skipt útaf á 32. mínútu í 3-2 tapi Englendinga gegn Hollendingum á Wembley á miðvikudagskvöldið.

Kenny Daglish sagði á blaðamannafundi fyrr í dag:  ,,Leikmennirnir eru að koma til baka í dag, þannig að við fáum mat á þá flesta þegar við ræðum við læknaliðið og svo skoðum við hlutina í framhaldi."

,,Ef ég veit ekki hvers eðlis meiðsli eru þá get ég ekki sagt ykkur hvort að hann (Gerrard) geti spilað gegn Arsenal.  Það er því best að sleppa því að vera með ágiskanir og bíða bara og sjá hvað læknarnir hafa að segja þegar þeir hafa skoðað hann."

Þó er ljóst að Daniel Agger verður ekki með gegn Arsenal á laugardaginn. Þess má geta að Daniel varð fyrir svipuðum meiðslum í haust í leik gegn Tottenham.

Dalglish sagði:  ,,Hann er með brákað rifbein og gæti því verið frá í nokkrar vikur.  Allir sem eru meiddir er klárlega saknað.  Daniel hefur verið að spila frábærlega á tímabilinu, en við söknum allra þeirra sem eru ekki klárir í slaginn."

,,Leikmannahópurinn er til þess að maður geti komið í manns stað þegar um meiðsli og bönn er að ræða - og við munum þurfa að nota aðra leikmenn í stað Daniel ef hann er frá í nokkrar vikur."

Hvað aðra leikmenn varðar mun Dalglish fá fréttir af þeim síðar í dag þegar leikmenn tínast einn af öðrum aftur á Melwood eftir landsleikjahléð.  Eftir það hefst svo undirbúningur fyrir stórleikinn gegn Arsenal.

Dalglish bætti við:  ,,Hvað við höfum í höndunum og hverjir spila gegn Arsenal veit ég ekki um því við höfum ekki æft eftir landsleikina.  Við vorum með 12 eða 13 leikmenn á ferð og flugi, við verðum því að bíða og sjá hvernig menn eru þegar þeir koma til baka."


TIL BAKA
Nýlegar fréttir
Fleiri fréttir
Fréttageymslan

Allur réttur áskilinn, © Liverpoolklúbburinn á Íslandi, 1999 - 2024

Email: [email protected].

Liverpoolklúbburinn á Íslandi á Facebook