Daniel talar hreint út!

Daninn Daniel Agger lá ekki á því eftir jafnteflið við Swansea á laugardaginn. Hann sagði Liverpool hafa spilað illa og líkti leikmönnum liðsins við hauslausar hænur sem ekkert vissu hvert ætti að fara eða gera!

,,Stundum litum við út eins og hauslausar hænur við að hlaupa á eftir boltanum. Ég held að allir hafi verið reiðir og vonsviknir. Sumir meira en aðrir og þannig er það."

,,Við vorum mjög lélegir. Þegar við náðum boltanum misstum við hann strax aftur. Við vorum ekki nógu ákveðnir og pressuðum ekki nægilega vel. Það voru svo margir hlutir sem ollu vonbrigðum, sérstaklega eftir að við spiluðum ágætlega í síðustu viku. Við verðum að vinna svona leiki, sama hvaða liði við stillum upp. Við erum Liverpool FC."
 
Stefnan hjá Liverpool er auðvitað að komast sem allra hæst í deildinni og til að komast í Meistaradeild þarf að ná einu af fjórum efstu sætunum.

,,Ef við spilum svona munum við ekki ná því. Við þurfum einfaldlega að gera betur. Ég segi ekki að þetta sé ómögulegt því þetta veltur á leikmönnunum. Við erum þeir einu sem geta gert gæfumuninn og við verðum að gera miklu betur."