Snýr Djibril aftur til Liverpool?

Það þarf ekki mikið til að koma sögusögnum, um vistaskipti, af stað þessa dagana enda stutt orðið í að það opnist fyrir félagaskipti. Við erum ekki mikið fyrir sögusagnir hér á Liverpool.is en þessi saga, sem Daily Mail, birti er að minnsta kosti skemmtileg.

Að minnsta kosti er skemmtilegt hvernig þessi tilgáta er búin til. Síðdegis á mánudaginn sást til þeirra Steven Gerrard og Djibril Cisse á sama matsölustaðnum í Liverpool. Meira þurfti ekki til að búa til kenningu sem kveður á um að Djibril komi hugsanlega sem lánsmaður til Liverpool eftir áramótin. Í sumar sagði Djibril að sig langaði til að spila með Liverpool á nýjan leik. Ekki draga þau orð úr líkindum kenningarinnar.

Djibril er núna leikmaður Panathinaikos á Grikklandi. Þar gekk honum stórvel á síðustu leiktíð og skoraði 29 mörk þegar lið hans vann bæði deild og bikar. Hann lék 79 leiki með Liverpool á sínum tíma og skoraði 24 mörk.