Fernando að skríða saman

Nýjustu fréttir herma að ekki sé útilokið að Fernando Torres geti tekið þátt í grannarimmunni á sunnudaginn. Hann er á góðum batavegi eftir að hafa tognað á nára gegn Blackpool í síðasta leik. 

Fernando hefur verið í stífri meðferð hjá læknaliði Liverpool frá því hann meiddist og nokkrar líkur eru á að hann geti spilað með á Goodison Park. Þátttaka hans hefur þó ekki enn verið staðfest enda nokkrir dagar í leikinn sjálfan.   

Þetta verða að teljast mjög góðar fréttir því miklu skiptir fyrir Liverpool að geta teflt Fernando fram gegn Everton. Leikir Liverpool og Everton eru alltaf mikilvægir og mikið undir en nú ber svo við að bæði lið eru í fallbaráttu og sigur á sunnudaginn er því enn mikilvægari en áður ef það er yfirleitt hægt þegar þessi lið leiða saman hesta sína.