Liverpool mætir Rabotnicki (uppfært)

Það var ljóst fyrir stundu hverjir mótherjar Liverpool verða í 3. umferð undankeppni Evrópudeildarinnar en makedónska liðið Rabotnicki sigraði FC Mika.

Liðin gerðu markalaust jafntefli í seinni leiknum en Rabotnicki voru með 1-0 forystu eftir fyrri leikinn.  Ekki er enn ljóst hvort að fyrri leikurinn verður spilaður á Anfield eða í Makedóníu en það veltur á því hvort að Teteks, sem einnig eru frá Makedóníu, komist einnig áfram í 3. umferð.  Gerist það mun fyrri leikurinn verða í Makedóníu en ekki á Anfield eins og ákveðið var þegar dregið var í fyrstu.

Leikur Teteks og FK Ventspils hófst núna kl. 14:30 og ættu úrslitin því að vera ljós um 16:30 ef ekki þarf að grípa til framlengingar.  Fyrri leikur liðanna endaði með 0-0 jafntefli á heimavelli FK Ventspils.

Uppfært:  Nú er ljóst að fyrri leikur Liverpool og Rabotnicki verður í Makedóníu eftir að Teteks báru sigurorð af FK Ventspils 3-1.  Fer leikurinn fram fimmtudaginn 29. júlí og síðari leikurinn viku síðar eða 5. ágúst og þá á Anfield.