Andriy Voronin aftur til Berlínar?

Samkvæmt þýska blaðinu Bild eru þreifingar í gangi milli Hertha Berlín og Andriy Voronin, en Úkraínski framherjinn þótti standa sig vel í herbúðum Berlínarliðsins á síðustu leiktíð.

Blaðið hefur eftir Voronin að hann sé í sambandi við forráðamenn félagsins og nú eigi í raun aðeins eftir að semja við Liverpool um verð. Framkvæmdastjóri Hertha, Michael Preetz, staðfestir að viðræður séu í gangi milli félagsins og Voronin.

Preetz leitar nú logandi ljósi að leikmanni sem getur styrkt sóknarleik liðsins og Úkraínski framherjinn sýndi það síðasta vetur að hann getur auðveldlega gert usla í Bundesligunni. Berlínarliðið reyndi að kaupa Voronin í vor þegar lánssamningur hans var við það að renna út, en samningar milli félagsins og Liverpool tókust ekki þá.

,,Ég hef verið í sambandi við Michael Preetz og hann vill fá mig aftur til Berlínar. Ég hef aldrei dregið dul á það að mér líkaði lífið vel í Berlín, en ég er líka alveg til í að vera um kyrrt í Liverpool. Svo framarlega sem ég fæ að spila", segir Voronin í samtali við Bild í gær. 

Andriy Voronin er 30 ára gamall og er samningsbundinn Liverpool til 2011. Talið er að verðmiðinn á kappanum sé um það bil 4 milljónir evra.