Tilboð komið í Arbeloa

Real Madrid hafa lagt fram tilboð í hægri bakvörðinn Alvaro Arbeloa uppá 5 milljónir evra en það eru u.þ.b. 4,2 milljónir punda.

Líklega mun Liverpool samþykkja þetta tilboð ef marka má það sem Rafael Benítez sagði í gær eftir að tilkynnt var um kaupin á Glen Johnson.  Benítez sagði að ef gott tilboð kæmi Arbeloa þá yrði það skoðað því leikmaðurinn á aðeins eitt ár eftir af samningi sínum við félagið.

Jorge Valdano sem er einn af yfirmönnum knattspyrnumála hjá Real Madrid sagði þetta um Arbeloa:  ,,Hann á aðeins eitt ár eftir af samningi sínum við Liverpool og það gefur okkur meiri möguleika.  Hann getur spilað tvær eða þrjár stöður og hann er fjölhæfur.  Hann er möguleiki sem við munum meta."

Arbeloa byrjaði í 43 leikjum á síðasta tímabili en eftir kaupin á Johnson er ansi líklegt að hann muni ekki fá eins mörg tækifæri á næsta tímabili.