Lykileinvígi í kvöld

Það verður hart barist á Anfield Road í kvöld þegar Liverpool og Real Madrid mætast í seinni leik liðanna í sextán liða úrslitum Meistaradeildarinnar. Allir leikmenn liðanna munu leggja sig alla fram hvar svo sem þeir spila á vellinum. Á vefsíðu ITV var litið á þrjú lykileinvígi leikmanna.

JAMIE CARRAGHER v GONZALO HIGUAIN

Jamie Carragher er lykilmaður í vörn Liverpool. Hann stjórnar vörninni af mikilli röggsemi og er mjög erfiður mótherji. Gonzalo er í skugganum af goðsögninni Raul en hann hefur samt verið hættulegasti framherjinn á þessari leiktíð og hefur skorað 14 mörk í 23 deildarleikjum. Hann hefur þó ekki enn skorað Evrópumark.

STEVEN GERRARD v FERNANDO GAGO

Fyrirliði Liverpool er mest skapandi leikmaður síns liðs hvort sem hann leikur framarlega á miðjunni eða í venjulegri fjögurra manna miðju. Hann er markahæsti maður liðsins síns í Meistaradeildinni á þessari leiktíð með fimm mörk. Það er trúlegt að Fernando verði látinn reyna að hafa hemil á Steven en þessi 22. ára Argentínumaður á samt mikið eftir ólært í því hlutverki.

FERNANDO TORRES v PEPE

Meiðsli hafa haft mikil áhrif á leikform Fernando og það á eftir að sjá hversu mikið hann getur spilað í leiknum. Hann hefur verið meiddur á ökkla og þarf að fara í læknisskoðun rétt fyrir leik til að skera úr hvort hann verður leikfær. Þessi fyrrum sóknarmaður Atletico Madrid vill endilega spila á móti þessum fyrrum grönnum sínum og reyna að skora sitt fyrsta Meistaradeildarmark á leiktíðinni. Pepe er núna besti varnarmaður Madrid. Hraði hans og leikskilningur mun skipta miklu í að halda Fernando í skefjum.

Svo er að sjá hvernig þessi einvígi og önnur þróast í kvöld!

Þeir Alvaro Arbeloa og Fernando Torres eru tæpir fyrir leikinn vegna meiðsla og ekki vitað hvort eða hversu mikið þeir geta tekið þátt í leiknum. Þeir Yossi Benayoun og Daniel Agger munu  ekki vera með vegna meiðsla.