Yossi Benayoun meiddur

Ísraelsmaðurinn Yossi Benayoun tognaði aftan á læri á æfingu um helgina. Þessi meiðsli komu á versta tíma fyrir Liverpool en Yossi er búinn að leika frábærlega síðustu vikurnar.

Samkvæmt fréttum þá verður Yossi hugsanlega úr leik í hálfan mánuð eða svo. Þetta þýðir að hann missir af Evrópuleiknum við Real Madrid á þriðjudagskvöldið og stórslagnum gegn Manchester United á laugardaginn. Annars á hann að fara í myndatöku í dag og þá kemur í ljós hversu alvarleg meiðslin eru.

Sem fyrr þá hefur Yossi leikið frábærlega með Liverpool upp á síðkastið. Hann hefur skorað tvö mörk í síðustu þremur leikjum og átt þátt í að minnsta kosti fjórum mörkum síðustu vikurnar.