Mascherano: Það getur allt gerst ennþá

Javier Mascherano hvetur liðsfélaga sína í dag til þess að yfirfæra hið góða gengi liðsins í Meistaradeildinni yfir á ensku deildina.

Á morgun mætir Liverpool Middlesboro á útivelli og Mascherano vonast eftir jafngóðum leik þar og gegn Real Madrid á miðvikudaginn.

Argentínski landsliðsfyrirliðinn segir að andrúmsloftið í herbúðum Liverpool sé frábært eftir hinn frækna sigur liðsins á Real, en bætir því jafnframt við að liðið sé enn í baráttunni í ensku deildinni og þar megi hvergi slaka á.

,,Sigurinn á Real Madrid gefur okkur aukið sjálfstraust, það er ekki spurning, en nú verðum við að einbeita okkur að leikjunum gegn Middlesboro á morgun og Sunderland á þriðjudaginn. Ef við ætlum okkur að eiga sjéns í baráttunni við Manchester United þá verðum við að vinna báða þessa leiki."

,,Við verðum að halda okkar striki, jafnvel þótt Man. U. sé dálítið á undan okkur eins og er. Maður veit aldrei hvenær þeir fara að tapa stigum, það getur allt gerst og við verðum að halda í vonina."