Voronin upp á kant við þjálfarann

Andriy Voronin segist ekki láta vaða yfir sig þrátt fyrir að það gæti komið honum í vandræði.

Voronin kom inná þegar Úkraína lék gegn Ítalíu í gær í riðlakeppni Evrópukeppni landsliða. Hann brást ókvæða við ummælum Oleg Blokhin landsliðsþjálfara síðla leiks og þeir lentu í hörkurifrildi við hliðarlínuna. Blokhin segir að þetta háttalag gæti orðið Voronin dýrkeypt og vandaði honum ekki kveðjurnar: "Hann styrkti okkur ekki mikið þegar hann kom inná og hann var einn þeirra sem átti sök á því að Ítalar skoruðu sigurmarkið. Hann virðist hafa bætt þremur kílóum á sig nýlega. Enginn leikmaður hefur rétt á að svara þjálfara sínum fullum hálsi. Ef hann vill öskra svona getur hann gert það hjá Liverpool og öskrað á Rafa Benítez. Ég bað liðið afsökunar á þessu eftir leikinn því að ég átti einnig sök á þessu atviki. Andriy finnst greinilega ónauðsynlegt að biðjast afsökunar og ef hann heldur uppteknum hætti hef ég engin not fyrir hann í landsliðshópnum."

Voronin segist ekki láta bjóða sér slíka framkomu í sinn garð: "Þetta atvik er ekki til að hreykja sér af en ég er enginn smákrakki. Ég læt ekki neinn valta yfir mig eins og Blokhin gerði."