Voronin gæti orðið ein bestu kaupin

Andriy Voronin gekk til liðs við Liverpool í byrjun sumars á frjálsri sölu og náði að slá í gegn hjá Liverpool frá því að hann lék sinn fyrsta leik fyrir félagið. Nú er hann kominn með þrjú mörk í fjórum leikjum sem að verður að teljast býsna góður árangur miðað við að hann er alveg nýr í liðinu og deildinni.

Gary McAllister fyrrum leikmaður Liverpool hrífst mjög mikið af Andriy Voronin og telur að hann geti orðið ein  af bestu kaupum tímabilsins: "Stundum þegar þú færð leikmann á frjálsri sölu þá getur hann verið gulls ígildi þegar uppi er staðið. Ég held það að fá leikmann eins og Andriy Voronin frítt geti reynst ein bestu viðskiptin á leiktíðinni.

Rafa mun ekki þurfa að eyða miklum tíma í að segja manni eins og Voronin hvað hann eigi að gera. Leikmaður með hans reynslu og hæfileika veit upp á hár hvenær og hvernig hann á að hreyfa sig. Maður hefur séð í þessum örfáum leikjum sem hann hefur leikið að hann er mjög öruggur og veit alveg hvað hann er að gera. Hann minnir mig á Teddy Sheringham hvað varðar hversu næmt auga hann hefur fyrir sendingum og staðsetningunni á honum.

Leikmenn eins og Fernando Torres og Ryan Babel eru dæmi um frábæra fjárfestingu. Þetta eru leikmenn sem verða betri og betri með hverju tímabilinu sem að þeir leika í deildinni og með betri leikmenn í kringum sig. Stjórinn mun svo byggja uppá þeim þegar sá tími kemur. 

Hins vegar eru leikmenn eins og Andriy Voronin og Yossi Benayoun leikmenn sem koma til félagsins með reynslu úr landsleikjum og hafa verið í bransanum nokkuð lengi. Þetta eru leikmenn sem er alltaf dýrmætt að hafa í félaginu sínu."