Cissé til Marseille og Hamann til City

Talið er að Djibril Cissé verði kynntur sem leikmaður Marseille á morgun.  Cissé fer á lánssamningi í eitt ár og líklegt er að franska félagið vilji ganga frá kaupum á honum næsta sumar.

Þó svo að aðeins sé um lánssamning að ræða í tilfelli Cissé er líklegt að brottför hans muni gefa Rafa Benitez meira fé til leikmannakaupa.  Líklegt var talið að Lyon og Marseille myndu bjóða eitthvað í kringum 8 milljónir punda í Cissé áður en hann fótbrotnaði í leik með franska landsliðinu.  Fótbrotið hefði ekki getað komið á verri tíma því Benitez var að vonast til þess að Cissé myndi standa sig vel á HM og þar með hækka í verði.

Af Dietmar Hamann er það að segja að hann hefur ákveðið að ganga ekki til liðs við Bolton og nú vonast Stuart Pearce til þess að ganga frá kaupum á honum uppá 500.000 pund í vikunni.  Stjóri Bolton, Sam Allardyce, hefur gefist upp í baráttunni við að fá Hamann til liðs við sig.