Fjöldi fólks fagnaði Bikarmeisturunum á götum Liverpool

Talið er að um eitthundrað þúsund manns hafi verið á götum Liverpool síðdegis í dag til að hylla Bikarmeistarana. Þeim var ekið á opnum strætisvagni um tíu mílna leið um götur borgarinnar. Með í för voru leikmenn aðalliðsins, forráðamenn og fjölskyldur. Fjöldi fólks varðaði leiðina sem strætisvagninn ók um. Fólk var skiljanlega í hátíðarskapi og veifaði treflum, borðum og fánum.

Fjöldinn var þó langt frá því eins mikill og hyllti liðið þegar það sneri heim með Evrópubikarinn eftir sigurinn í Istanbúl. Þá er talið að hátt í ein milljón manna hafi verið á götum Liverpool. En það var samt hátíðarstemming í Liverpool í dag og margir lögðu leið sína út á götur til að sjá hetjurnar sínar og bikarinn sem nú mun gista bikarageymslurnar á Anfield Road í sjöunda sinn!