Pep Lijnders kominn á annan bekk!

Pep Lijnders er kominn á annan varamannabekk. Hann er nú, má segja, kominn í herbúðir óvina. Hollendingurinn er núna hægri hönd Pep Guardiola framkvæmdastjóra Manchester City.

Pep kom til Liverpool, sem unglingaþjálfari, 2014 þegar Brendan Rodgers var framkvæmdastjóri. Hann fór ári seinna að vinna við þjálfun aðalliðsins. Pep hélt áfram hjá félaginu þegar Jürgen tók við af Brendan haustið 2015. 

Í byrjun ársins 2018 tók Pep við sem framkvæmdastjóri NEC Nijmegen sem þá var í næst efstu deild í heimalandi hans. Hann stoppaði stutt við þar og missti starf sitt hjá hollenska liðinu þá um sumarið og kom aftur til starfa hjá Liverpool. Hann varð þá nánasti aðstoðarmaður Jürgen Klopp og var hans hægri hönd þangað til Jürgen lét af störfum sem framkvæmdastjóri Liverpool.

Pep gerði í maí 2024 samning við austurríska liðið Red Bull Salzburg. Honum gekk ekki vel þar á bæ og þann 16. desember var tilkynnt að valdatíð hans væri á enda.

Þann 10. júní var Pep kynntur til sögunnar sem nánasti aðstoðarmaður Pep Guardiola framkvæmdastjóra Manchester City. Finnst sumum stuðningsmönnum Liverpool sem að Pep hafi svikið lit því Manchester City var lengst af á valdatíð Jürgen Klopp helsti keppinautur Liverpool!