Mikil tilhlökkun í Plymouth

Liverpool mætir Plymouth Argyle í FA bikarnum í dag. Íslenski landsliðsmaðurinn Guðlaugur Victor Pálsson er í liði Plymouth. Hann segir að mikil tilhlökkun ríki hjá leikmönnum liðsins að mæta besta liði í heimi eins og Guðlaugur sagði í viðtali við Vísi. 

,,Við erum búnir að undirbúa okkur vel og auðvitað viljum við vinna en við þurfum að njóta þess líka að spila á móti besta liði í heimi. Ég held þetta sé meiri tilhlökkun en eitthvað annað. Menn eru að biðja um fleiri miða, fjölskylda og vinir eru öll að koma. Þetta er ótrúlega skemmtilegt.

Guðlaugur Victor Pálsson var á mála hjá Liverpool frá 2009 til 2011. Hann gerði samning við Liverpool í janúar 2009. Guðlaugur yfirgaf Liverpool í janúar 2011 og gekk til liðs við skoska liðið Hibernian. Hann hafði áður á þeirri leiktíð, 2010/11, verið í láni hjá Dagenham & Redbridge. Guðlaugur spilaði tvo æfingaleiki með aðalliði Liverpool sumarið 2010.

Plymouth er 12. liðið sem Guðlaugur hefur spilað fyrir á löngum ferli sínum. Hann spilaði með yngri flokkum Fjölnis og Fylkis áður en hann fór til AGF í Danmerku sumarið 2007. Hann hefur leikið 47 landsleiki fyrir Ísland og skorað tvö mörk. Guðlaugur verður 34 ára 30 apríl næstkomandi.  

Hér er umfjöllunin um Guðlaug í heild sinni á Vísi.is.

Liverpool mætti Plymouth síðast á leiktíðinni 2016/17. Liðin mættust þá í 3. umferð FA bikarsins. Liðin skildu jöfn án marka á Anfield Road en Liverpool vann 0:1 í aukaleik. Lucas Leiva skoraði markið.