Ofurhetja í uppbótartíma

Darwin Nunez er oft í vandræðum með að klára færin sín, en mörkin hans tvö í leiknum gegn Brentford um helgina færðu hann þó ansi nálægt einu markameti. Það er í það minnsta eitthvað.

Nunez skoraði tvö mörk í uppbótartíma á laugardaginn - og var heppinn að næla sér ekki í rautt spjald líka, en það er önnur saga.

Einhvers staðar sá ég að enginn hefði skorað fleiri mörk í uppbótartíma á útivelli í sögu Úrvalsdeildarinnar en Nunez, en ég sel það ekki dýrara en ég keypti það. Á opinberri heimasíðu Liverpool má hins vegar sjá það svart á hvítu að einungis Sadio Mané hefur skorað fleiri mörk í uppbótartíma en Úrúgvæinn.

Mané trónir semsagt á toppnum á þessum uppbótartímalista, en hann náði sex mörkum eftir að venjulegur leiktími rann út. Eftirminnilegasta markið af þessum sex er, að minnsta kosti í mínum huga, markið gegn Aston Villa fyrir 5 árum.

Darwin Nunez er sem fyrr segir næstur á eftir Mané á þessum lista, en með honum í 2. sætinu eru Steven Gerrard og Fernando Torres. Ekki slæmur félagsskapur það. 

Aðrir á listanum eru Dirk Kuyt með 4 mörk, Origi, Suarez og Salah með 3. Næstir koma Babel, Benayoun, Benteke, Milner, NGog, Wijnaldum og sjálfsmark(!) með 2 og síðan heljarinnar hellingur með 1 mark. Þar á meðal Alisson Becker sem á líklega glæsilegasta uppbótarmarkið af þeim öllum.