Fabio Carvalho seldur

Ferill Fabio Carvalho hjá Liverpool er á enda. Hann hefur verið seldur. Sala hans kemur kannski aðeins á óvart því honum gekk vel á undirbúningstímabilinu. Hann skoraði tvö mörk og spilaði vel. 

Fabio, sem verður 23. ára nú 30. ágúst, er nú orðinn leikmaður Brentford. Liverpool fær 22 og hálfa milljón sterlingspunda fyrir hann. Ákvæði í samningnum geta komið kaupverðinu upp um fimm milljónir. Liverpool fær svo 17,5 % af hugsanlegu söluverði Portúgalans ef Brentford selur hann. 

Fabio kom til Liverpool frá Fulham sumarið 2022. Liverpool borgaði fimm milljónir fyrir hann. Fulham fær nú 20% af kaupverði Brentford þegar upphæðin sem Liverpool borgaði hefur verið dregin frá. 

Fabio gekk býsna vel á fyrstu leiktíð sinni, spilaði 21 leik og skoraði þrjú mörk. Hann varð Skjaldarhafi í fyrsta leik sínum með Liverpool. Á síðasta keppnistímabili var hann lánaður til Red Bull Leipzig. Honum gekk ekki nógu vel þar og kom aftur heim til Liverpool á miðri leiktíð. Hann staldraði stutt við og var lánaður til Hull City. Þar gekk honum mun betur.

Liverpool klúbburinn á Íslandi þakkar Fabio Carvalho fyrir framlag sitt hjá félaginu. Um leið er honum óskað góðs gengis.