Landsleikjafréttir

Hér er síðasta yfirferð yfir gengi leikmanna Liverpool í þessari landsleikjatörn.

Á mánudaginn voru þrír leikmenn félagsins í eldlínunni. Ibrahima Konaté var í byrjunarliði Frakka gegn Króatíu í Þjóðadeildinni. Hann spilaði allan leikinn í 0-1 tapi á Stade de France, mark Króata kom úr vítaspyrnu eftir að Konaté hafði gerst brotlegur innan vítateigs.

Curtis Jones og Harvey Elliott spiluðu báðir með U-21 árs liði Englendinga gegn Slóveníu í undankeppni EM. Jones spilaði allan leikinn en Elliott kom inná sem varamaður á 61. mínútu í 1-2 tapi enskra.

Á þriðjudaginn kláraðist svo þessi hrina og þeir Caoimhin Kelleher og Takumi Minamino spiluðu með liðum sínum. Kelleher stóð í marki Íra allann tímann er þeir gerðu 1-1 jafntefli við Úkraínu í Þjóðadeildinni. Minamino spilaði í 71 mínútu þegar Japanir töpuðu 3-0 fyrir Túnis.

Nú geta leikmenn félagsins notið þess að vera í fríi í nokkrar vikur áður en nýtt tímabil hefst á ný. Fríið verður ekki ýkja langt þar sem næsta tímabil hefst óvenju snemma til að koma Heimsmeistarakeppninni fyrir í dagatalinu.