Landsleikjafréttir

Hér kemur næsti skammtur af gengi Liverpool manna með landsliðum sínum.

Á þriðjudagskvöldið mættust Senegal og Rúanda í undankeppni Afríkumótsins. Komið var vel fram í uppbótartíma þegar Senegalar fengu vítaspyrnu, Sadio Mané fór á punktinn og tryggði sigurinn, nánar tiltekið á 98. mínútu. Senegalar hafa nú unnið tvo fyrstu leiki sína í undankeppninni.

Ensku U-21 árs strákarnir mættu Albaníu í undankeppni Evrópumóts U-21 liða og sigruðu örugglega 3-0. Curtis Jones byrjaði leikinn og var skipt útaf á 73. mínútu. Sigurinn tryggði Englendingum sæti í lokakeppninni sem fer fram í Rúmeníu og Georgíu á næsta ári.

Í sömu undankeppni skoraði Sepp van den Berg fyrir Hollendinga í 6-0 sigri á Gíbraltar. Hollendingar leiða E-riðil með einu stigi fyrir lokaumferðina.

Í Þýskalandi mættust svo heimamenn og Englendingar í Þjóðadeildinni. Trent Alexander-Arnold sat á bekknum allan tímann þegar liðin skildu jöfn 1-1.

Á miðvikudaginn voru þeir Andy Robertson og Caoimhin Kelleher í eldlínunni í Þjóðadeildinni.

Robertson leiddi Skota til leiks á Hampden Park gegn Armeníu þar sem heimamenn sigruðu 2-0. Robertson var skipt útaf á 76. mínútu. Steve Clarke, landsliðsþjálfari Skota, hafði þetta að segja um Robertson eftir leik: ,,Ég verð að minnast á fyrirliðann, mér fannst hann vera framúrskarandi. Í búningsklefanum fyrir leik voru hann, John McGinn og Callum McGregor sannkallaðir leiðtogar og þeir sáu til þess að hugarfarið var rétt úti á vellinum enda spiluðu þeir allir mjög vel. En mér fannst eins og áður sagði fyrirliðinn skara framúr. Andy hefur vaxið upp í þetta hlutverk og stundum fær hann ekki það hrós sem hann á skilið."

Það fór ekki eins vel hjá Kelleher og félögum í írska landsliðinu á heimavelli gegn Úkraínu þegar gestirnir fóru með sigur af hólmi 0-1. Kelleher spilaði allan leikinn í marki Íra.