Nú liggja allir vegir til Parísar!

Nú liggja allir vegir til Parísar. Úrslitaleikurinn um Evrópubikarinn fer fram á Frakklandsleikvanginum þar í borg á laugardaginn. 

Jürgen Klopp og föruneyti fara til Parísar seinna í dag. Allir aðalliðsmenn Liverpool eru leikfærir utan við Divock Origi. Liðshópur Liverpool er sterkur og það sama má segja um Real Madrid. 

Stuðningsmönnum fer fjölgandi í París með hverri klukkustundinni. Ferðalag frá Liverpool til Parísar er frekar einfalt og víst er að tugþúsundir stuðningmanna Liverpool verða í borginni um helgina. 


Frakklandsleikvangurinn tekur 80.698 áhorfendur en eins og venjulega á úrslitaleikjum fara alltof margir miðar til styrktaraðila og gesta Knattspyrnusambands Evrópu. Stuðningsmenn liðanna reyna auðvitað að næla í eins marga miða og kostur er fyrir utan þá miða sem félögin fá úthlutað. 


Liverpool og Real Madrid brjóta blað í sögunni. Aldrei áður hafa sömu liðin leikið þrisvar til úrslita um Evrópubikarinn. Liðin mættust einmitt fyrst í París 1981 í leik sem Liverpool vann 1:0. Real hafði svo betur 3:1 í Kænugarði vorið 2018. 

Liverpool stefnir á að vinna Evrópubikarinn í sjöunda sinn. Real Madrid á 13 Evrópubikara á sinni afrekaskrá. Það ræðst á Frakklandsleikvanginum í París hvort félagið bætir Evrópubikarnum í safn sitt fyrir leiktíðina 2021/22!