Frækilegt afrek!

Er ekki hægt að segja að það sé frækilegt afrek að skora fjögur mörk úr vítaspyrnum í sama leiknum? Fyrrum leikmaður Liverpool afrekaði þetta á dögunum. 

Cameron Brannagan vann þetta afrek í leik Gillingham og Oxford United sem fór fram þann 29. janúar. Oxford tók Gillingham í gegn og vann 2:7 á útivelli. Sem fyrr segir skoraði Cameron fernu úr vítum. Hann skoraði fyrsta mark sitt á 12. mínútu og svo á 48., 55. og 83. mínútu. Frækilegt og fágætt afrek en leikmaður hafði aldrei áður skorað fernu úr vítum í sögu Oxford.


Cameron, sem er fæddur í Manchester, kom til Liverpool á unga aldri og var hjá félaginu þar til hann gekk til liðs við Oxford í janúar 2018. Hann hafði áður verið í láni hjá Fleetwood Town árið 2017. Hann lék níu leiki með aðalliði Liverpool. Hann lék á sínum tíma með landsliði Englands undir 18 ára og undir 20 ára. 

Cameron Brannagan er snjall miðjumaður og hefur verið lykilmaður hjá Oxford, sem leikur í þriðju efstu deild, frá því hann kom til félagsins. Leikmenn kusu hann Leikmann ársins hjá Oxford fyrir leiktíðina 2018/19.