Afríkumótið

Þremenningarnir Sadio Mané, Naby Keita og Mohamed Salah hafa nú spilað annan leik í riðlakeppninni, hér lítum við á hvernig landsliðum þeirra gekk.

Senegal og Gínea mættust í B-riðli og spiluðu þeir Mané og Keita allan leikinn fyrir sín lið. Leikurinn endaði með markalausu jafntefli og eru því bæði lið með fjögur stig fyrir lokaleikinn og því í ágætri stöðu með að komast áfram í 16-liða úrslit. Í hinum leik riðilsins unnu Malaví 2-1 sigur á Simbabve.

Í lokaumferð riðilsins, sem fer fram á þriðjudaginn, mætast Senegal og Malaví annarsvegar og Gínea og Simbabve hinsvegar.

Í D-riðli skoraði Mohamed Salah eina mark leiksins í sigri á Gíneu-Bissá, með skoti úr þröngu færi í seinni hálfleik. Eftir tap gegn Nígeríu í fyrsta leik var sigurinn því gríðarlega mikilvægur fyrir Egypta. Eitt stig ætti að duga fyrir þá í lokaleiknum gegn Súdan á miðvikudaginn kemur.

Í hinum leik riðilsins unnu Nígeríumenn 3-1 sigur á Súdan og eru þeir komnir áfram í 16-liða úrslitin.