Óskað eftir frestun

Liverpool hefur sent inn beiðni þar sem óskað er eftir því að leiknum við Arsenal í undanúrslitum Deildarbikarsins verði frestað. Þá hefur félagið staðfest að Pepijn Lijnders er einnig smitaður.

Nú rétt í þessu var að berast tilkynning frá Liverpool þess efnis að Pep Lijnders er smitaður og því ljóst að fáir eru eftir í starfsliðinu til að stjórna af bekknum. Blaðamannafundi sem átti að vera í dag hefur verið slegið á frest.

Fleiri smit hafa greinst í leikmannahópnum sem og hjá starfsmönnum liðsins og ekki bætir úr skák að nokkrir leikmenn eru á meiðslalistanum einnig. Hætt var við æfingu hjá aðalliðinu á þriðjudaginn sem bendir til þess að fleiri smit hafi greinst innan hópsins. Sögusagnir hafa heyrst af því að til dæmis sé enginn markvörður tiltækur í hópnum en það hefur ekki verið staðfest af Liverpool FC.

Félagið vildi senda inn beiðni um frestun sem fyrst með tilliti til þeirra stuðningsmanna sem hyggjast ferðast til London og styðja sitt lið. Svo má einnig gera ráð fyrir því að fleiri smit greinist í dag, miðvikudag og því ekki hægt annað en að óska eftir frestun.

Við fylgjumst með gangi mála í dag hér á vefnum.