| Grétar Magnússon

Spáð í spilin

Það er stórleikur á dagskrá í kvöld þegar Chelsea mæta á Anfield. Bæði lið eru í harðri baráttu um að tryggja sér Meistaradeildarsæti á næstu leiktíð.

Eins og staðan er núna í deildinni eru nokkur lið með í baráttunni um Meistaradeildarsæti, of mörg lið að mínu mati en svona er þetta bara í jafnri deild (fyrir utan toppliðið). Úrslit leikja það sem af er þessari umferð hafa verið okkar mönnum hagstæð og því væri tilvalið að hamra járnið á meðan það er heitt og komast nær liðunum fyrir ofan í töflunni. Mótherji kvöldsins gæti varla verið erfiðari ákkúrat núna en Chelsea hafa ekki tapað síðan þeir skiptu um stjóra og Thomas Tuchel tók við af Frank Lampard. Tuchel og Klopp þekkjast jú auðvitað ansi vel, fyrir utan það að vera báðir þýskir þá tók Tuchel við stjórn Mainz og Dortmund eftir að Klopp lét af störfum þar. Tuchel stýrði svo auðvitað PSG þegar okkar menn voru með franska liðinu í riðli í Meistaradeildinni tímabilið 2018-19, Klopp vann á Anfield en Tuchel sigraði í París.

Betri fréttir berast nú af meiðslum en þeir Fabinho, Jota, Alisson og Davies æfðu allir í vikunni. Jota er víst að glíma við einhverja magapest og hefur kannski ekki alveg æft að fullu en hann hlýtur að vera í leikmannahópnum í kvöld. Stóra spurningin er sú hvort við sjáum Fabinho fara á miðjuna eða aftur í vörnina í þessum leik. Það er þétt spilað núna, annar leikur næstkomandi sunnudag og því gæti alveg eins verið að Klopp gefi t.d. Wijnaldum hvíld á miðjunni, haldi sig við óbreytt miðvarðarpar frá síðasta leik og leyfi Fabinho að spila í sinni vanalegu stöðu. Fremstu þrír ættu að vera líkt og vanalega þar sem ég geri ekki ráð fyrir því að Jota sé klár í að byrja leik. Auðvitað er alveg eins líklegt að Klopp komi okkur eitthvað á óvart með liðsvali sínu í kvöld og það er að minnsta kosti ánægjulegt að vita til þess að möguleikar hans til að stilla upp liði eru nú fleiri en oft áður á þessu tímabili.

Gestirnir frá Lundúnum glíma ekki við mikil meiðsli í sínum hóp. Thiago Silva er staðfest ekki með og Tammy Abraham er smá tæpur en er þó talinn vera í leikmannahópnum. Ég myndi frekar vilja sjá hann spila í kvöld frekar en Olivier Giroud, sem skorar yfirleitt gegn Liverpool og virðist ekki þykja leiðinlegt að mæta þeim rauðu. Tuchel mun klárlega stilla upp sínu sterkasta liði og freista þess að komast nær topp fjórum og þar með lengra frá okkar mönnum í töflunni. Chelsea hafa ekki sigrað á Anfield síðan árið 2014 en það ár unnu þeir reyndar tvo deildarleiki á Anfield, auðvitað á sitthvoru tímabilinu. 

Síðustu fjórir heimaleikir hafa allir tapast og það bara hlýtur að vera að þessari taphrinu fari að ljúka. Það er annaðhvort í ökkla eða eyra hjá okkar ástkæra félagi, tapa ekki í 68 leikjum í röð á Anfield en þegar stíflan brast þá stefnir í lengstu taphrinu félagsins á heimavelli frá upphafi ! Ég neita að trúa því að enn annar leikurinn tapist á heimavelli núna. Spáin að þessu sinni er sú að Liverpool vinnur 2-1 sigur. Ég ætla ekkert að segja til um hvernig mörkin raðast niður en segjum þó allavega að það verði einhver dramatík á lokamínútunum.

Fróðleikur:

- Mohamed Salah er sem fyrr markahæstur okkar manna í deild með 17 mörk það sem af er tímabils.

- Tammy Abraham er markahæstur í deild hjá Chelsea með 6 mörk.

- Okkar menn sitja í 6. sæti deildarinnar með 43 stig eftir 26 leiki.

- Chelsea eru sæti ofar með 44 stig eftir jafnmarga leiki.


TIL BAKA
Nýlegar fréttir
Fleiri fréttir
Fréttageymslan